Shine．尖沙咀新派西餐廳（已結業）

Shine嘅brunch menu有6款，例如沙律、炸魚薯條、all day breakfast、多士等，定價$78-148，包括咖啡/茶，亦可以加錢升級特飲。

芝士雞扒牛角包配薯角 $98

估唔到份量幾多，首先一大個牛角包，裡面夾有芝士雞扒，加上薯角、沙律菜伴碟，好豐富，作為第一餐，好滿足，而且都好夠飽。牛角包微溫，入口酥脆，芝士味唔算好濃郁，雞扒肉質都幾嫩，唔會老或者鞋。雖然食起來有啲狼狽，不過都幾美味。我同朋友都好鐘意伴碟嘅薯角，新鮮熱辣炸起，外脆內軟，只係有幾塊稍為黐埋左一齊。

全日早餐 $148

Shine呢份All Day Breakfast有多士、德國腸、火腿、大蘑菇、炒蛋、沙律菜、煙三文魚，份量適中，唔會太小家，而且配料係即時煮起，唔係整定好耐。


炒蛋入口最滿足，因為超新鮮熱辣，而且口感夠滑，蛋味香。煙三文魚有好幾大片；大蘑菇爆汁；其他材料係正常水準。不過硬係要雞蛋挑骨頭嘅話，個人認為沙律菜可以加番多啲sauce或者係沙律醋、油，會冇咁乾。而多士亦未有於上枱時附上牛油，不過有需要亦可向店員索取。

鎮店漢堡 SHINE Burger $168

餐廳同名漢堡相信都係招牌之一，下單時店員會提醒，牛肉預設為5成熟，會問客人有冇需要改動，富彈性。SHINE漢堡賣相非常吸引，頂頭串左兩大片炸洋蔥圈，而漢堡都幾大份，裡面有牛肉、煙肉、蕃茄、生菜等。洋蔥圈新鮮炸起，入口香甜，平衡飽滯感。我地幾輕鬆就可以切開漢堡，唔會話食得太狼狽。牛肉食落好juicy，熟食度剛好，肉嫩唔韌唔老。

海鮮墨汁意大利飯 $188

意大利飯價錢雖然貴啲，但非常美味，首先裡面有魚肉、魷魚、帶子、蝦、青口，甚有誠意。Shine意大利飯份量頗多，食落鹹香，帶墨魚汁味道，飯粒大而硬身，後續有少少辣味，好惹味。海鮮更加冇話說，蝦已去殼，又大隻又新鮮，燒過好香口。帶子剛好熟，口感爽鮮。

玫瑰蘋果金寶 $78

蘋果金寶嘅造型好靚，擺盤精美，伴有一球雪糕、水果、棉花糖。外型幾靚，不過冇乜平時食蘋果金寶嘅感覺。肉桂香口，加起微溫嘅蘋果片、醬，口感豐富，外皮腍腍地，唔係脆的。

提拉米蘇 $58

飲品做得幾出色，brunch menu可以加錢upgrade特飲，至於smoothie不包括在內，需要單點。

奇異果梳打 +$15

估唔到都幾特別，又冇違和感。奇異果香甜，清新，配上梳打，唔係好多汽果黎種，我都幾鐘意飲。

香蕉朱古力冰沙 $58

香蕉同朱古力味平衡得剛好，唔會好甜，而且朱古力味都夠濃。

荔枝玫瑰梳打 +$15

荔枝味清甜，甜度適中，裡面亦有荔枝肉，加入玫瑰花瓣，令賣相更討喜，玫瑰味香而唔假。

雜莓乳酪 $58

用上新鮮果肉打成，唔係加糖漿，而且混合乳酪，酸酸甜甜。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com