愛麗絲的秘密花園

(24 票)
愛麗絲的秘密花園

愛麗絲的秘密花園.遊走夢幻世界

愛麗絲的秘密花園 Wonder Garden Cafe - 相信唔少人都有睇過《愛麗絲夢遊仙境》,但有冇諗過親身到仙境一遊?不論書、動畫、電影等唔同版本都廣受歡迎,因此一路以來都有一班愛麗絲嘅忠實粉絲。世界各地,例如台灣、泰國都有愛麗絲主題餐廳,至於香港呢?雖然早前都有餐廳曾經推出過相關主題嘅美食,但真正由裝潢、食物都以愛麗絲作背景嘅少之有少。愛麗絲的秘密花園現正開業,一眾Alice嘅粉絲可以去潮聖、影相呃like喇!

MrMrsFoodHK今次就喺旺角試左呢間新開業嘅愛麗絲主題餐廳:

愛麗絲的秘密花園餐廳位於高氏大廈6樓,一出電梯口,已經見到愛麗絲故事嘅場景,客人可以準備踏入夢幻嘅世界。
單單一條走廊足見店家嘅心思,以主題餐廳而言,製作相當認真,有部分擺設更加係人手製造、加工。
由於愛麗絲的秘密花園剛開業冇耐,所以人流唔多,店員暫時都能夠充當導賞嘅角色,為每位客人介紹佢地嘅佈置,如何配合主題、食物,加上店員都好熟悉愛麗絲呢部作品,令客人都份外投入。

愛麗絲的秘密花園 愛麗絲的秘密花園

雖然餐廳位置有限,但裡面嘅裝潢亦都冇令人失望,連唔係愛麗絲粉絲嘅我都少女心發作,不停影相。相信如果係忠實fans,見到咁立體嘅場景相信都會好興奮。

愛麗絲的秘密花園
愛麗絲的秘密花園

店主喺裝潢上確係花左唔少心機,唔同嘅位置都有特別嘅設計,務求令每個角落嘅客人都影到靚相!




愛麗絲的秘密花園 愛麗絲的秘密花園 連個陀錶我都影左好耐呢!

愛麗絲的秘密花園 愛麗絲的秘密花園

由於餐廳仍在試業中,菜式尚未落實,以下幾款可以作為參考,不過完整餐單可能要再向店家查詢。

喺「Drink Me」menu裏面,有咖啡、茶、奶類、梳打飲品,全部以《愛麗絲夢遊仙境》人物名命,例如以下嘅漸層飲品係「白皇后」。(店主話訂咗更配合主題嘅杯未到貨,好期待呢!)

白皇后$48 / 咧嘴貓 $48

其實係凍水蜜桃乳酸梳打,漸層顏色好靚,水蜜桃味重,不過留意呢杯會稍甜。紫色呢杯係凍原個青檸藍梳打,呢杯相對冇咁甜,顏色一樣夢幻。

愛麗絲的秘密花園
愛麗絲的秘密花園

當然亦都有「Eat Me」餐單,暫時見到選擇都唔少,例如沙律、意粉、小食、甜品。不過由於都係試業形式,所以有部分菜式暫時未有供應,以下幾款可以參考:
餐湯一啲都唔馬虎,店主話都係即點即做,味道相當唔錯,蔬菜味濃郁。
愛麗絲的秘密花園

煙三文魚沙律

份量一般,不過沙律菜非常新鮮。未知店家日後落實餐牌會唔會保留呢款沙律。(連餐具都好靚,一定滿足到相機食先嘅朋友)
愛麗絲的秘密花園




鮮蝦配鮮製菠菜忌廉意粉

一上枱嘅時候,都有個疑問,鮮蝦呢...?原來「寶物尋歸底」,蝦嘅份量都唔少,不過通通埋喺意粉下呢!
有客人認為意粉比較腍身,我個人覺得還好,菠菜意粉比較乾身,喜歡醬多嘅朋友可能要點卡邦尼。
—般我都唔太期待主題餐廳嘅食物,不過呢碟意粉味道尚算不俗,單點嘅話,我見價錢大約七、八十蚊,視乎款式。
愛麗絲的秘密花園

特偉兄弟雙胞胎 $54

如圖中所見,「特偉兄弟雙胞胎」其實係迷你芝士漢堡,由於係即製,需時等候,我就襯空檔時間四圍影相。
首先見到實物,份量都唔算迷你,以呢個價錢,再配合食落嘅質素,漢堡相對意粉實在更值得一試,相當出色。
愛麗絲的秘密花園

兩件雖然外表唔同,但都係芝士漢堡,餡料用嘅係手打牛肉。漢堡包由於烘過,非常脆口,而且帶麥味,感覺冇咁油膩。
牛肉餡都幾大塊,配合洋蔥、芝士,味道唔錯。店主仲話日後有機會加入雞肉,客人可以有更多選擇。
愛麗絲的秘密花園

整體而言,餐廳佈置裝潢認真,唔會求其擺兩張凳、加幾個公仔就話係主題餐廳,呢個位都加唔少分;食物方面由於餐單未完善,所以選擇唔多,不過慶幸味道都可以接受,而價錢亦都比一般主題餐廳親民;加上店員都睇得出係喜歡愛麗絲嘅人,盡可能都想將餐廳每個角落特色介紹俾客人,實在難得。

最重要係,由於餐廳新開張冇耐,未受廣泛報導,客人唔算話好多,我地晚餐時間去到,都仲可以大影特影!加上大部分食物都係即時製作,唔似一般掛名cafe實質食快餐,客人都可以慢慢品嚐食物。
最後修改於 8月10日,2017
loading...




  • 地址: 九龍旺角彌敦道577號高氏大樓6樓B室
MrMrsFoodHK

Life is short; Enjoy it !
唔是食家 超唔專業 只係鐘意食
Eat || Travel || Share

Instagram: https://www.instagram.com/mr_mrs.food
Facebook: https://www.facebook.com/pg/mrmrsfoodhk 
Blog: https://www.pixnet.net/blog/profile/ywycarol

愛麗絲的秘密花園交通、位置、地圖及鄰近好去處



* 閣下與本網站內的廣告商之間的通信或交易,或閣下就廣告商推銷的參與,純屬閣下與該廣告商之間的事宜,而廣告及推廣優惠請參照廣告商最新資訊,對於因任何此等交易或由於廣告在本網站內的出現而引致的任何損失或損害,我們慨不會負法律責任或負責。