Burger Lab．佐敦性價比高漢堡小店

8月3日,2020
作者 MrMrsFoodHK
發佈於人氣食店

(4 票)

【特色餐廳】【佐敦美食】 Burger Lab是間位於佐敦的漢堡小店。Burger Lab的漢堡份量足，價錢公道，仲不時推出新款漢堡 - 如「試管漢堡」等等。近年主打漢堡的食店愈開愈多，當中部份更不是連鎖而是由小店經營，質素都唔錯！Burger Lab值得介紹及再訪呢！

更多最新「人氣食店」文章： » PONDSIDE．金鐘隱世湖畔純白小屋 » N.28 Teppanyaki．尖沙咀高質抵食鐵板燒 » 五武士．K11高質日本餐廳＋武士主題＋維港靚景 » AMIS．法日Fine Dining慶祝餐廳推介 » 讚好台灣．糧尾必吃$34台式套餐

Burger Lab小店只有兩邊面壁位，位置唔多，裝潢簡單平實。除左堂食，都有唔少人買外賣。食漢堡佔嘅時間唔多，所以翻桌快，唔需要擔心會等太耐。
Burger Lab 佐敦

Burger Lab餐牌供應八款漢堡，有牛肉堡、日燒吞拿漢堡、烤豬頸肉漢堡、芝士雞肉漢堡、田園漢堡等，定價$48-88，可按喜好再加錢配額外配料。另外有三文治、小食，價錢合理。 Burger Lab食物即時製作，需時等候，隱約都會望到廚房嘅製作情況，乾淨衛生。唯一吐糟係店內冷氣略有不足，中午時份真係頗熱。
Burger Lab 佐敦

特級牛肉漢堡 $88+$22(配蕃薯條/薯條、飲品)

材料有特選美國牛肉雙層漢堡扒、煙肉、蕃茄、生菜、美式芝士、水煮蛋，配上自家製燒烤醬製成。漢堡實物都幾巨型，男士食都覺得相當飽肚，如果胃口不大，可以點經典牛肉漢堡，少一層，平30蚊。漢堡包熱辣辣，咬落香脆鬆軟，而且搽左牛油，配埋流心嘅水煮蛋，蛋黃汁湧住出黎，個人認為好有誠意。
Burger Lab 佐敦

牛肉漢堡扒牛味都濃，肉汁豐富唔乾，打孖黎兩塊，又大又厚身，口感豐富，煙肉都比下去。加上半溶芝士，芝味濃郁，咁嘅價錢，性價比高。呢個漢堡大到一口食唔到，好在小店有手套、濕紙巾，否則其實都幾狼狽。食漢堡點都唔少得薯條，薯條都係即時炸起，粗薯香脆。但隔離飯香，旁邊客人點左蕃薯條，賣相睇落更加吸引，再訪我都想試下。
Burger Lab 佐敦

小店試管漢堡：小龍蝦蛋漢堡 $68

Burger Lab的「試管漢堡」係店家研發嘅新口味漢堡，呢款小龍蝦蛋漢堡都幾有特色，至少未喺其他漢堡店見過，可能小龍蝦喺香港都唔算好流行。小龍蝦嘅份量非常多，雖然味道唔及龍蝦咁鮮味，但口感爽口唔實，配上芝士、水煮蛋、青瓜，清新不膩。平日胃口頗大嘅我獨食一個漢堡，非常飽肚。
Burger Lab 佐敦

Burger Lab小食方面除左蕃薯條、薯條、薯格，仲有燒粟米、雜錦蘑菇，同埋好juicy嘅蜜糖烤菠蘿，定價$28-35。

蜜糖烤菠蘿 $32

新鮮菠蘿搽上蜜糖即時烤至微焦，食落又香又甜，食完漢堡不妨試埋，以甜品作結，大滿足。
Burger Lab 佐敦

菠蘿茉莉花茶 +$8

除左汽水、果汁等，只要惠顧套餐都可以加8蚊升級bless嘅冷壓果汁，無添加嘅天然菠蘿茶飲落清甜，不失為一個選擇。
Burger Lab 佐敦

整體而言，Burger Lab嘅漢堡同小食都幾有水準，結合份量、價錢，只能講CP值高啊，炎炎夏日都令我有再想黎Burger Lab食嘅打算。

最後修改於 10月6日,2020

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com

Burger Lab．佐敦性價比高漢堡小店

查看地圖

地址: 佐敦庇利金街14-22號3號舖
開放時間: 星期一至日11:00 - 21:00
電話號碼: 92133315
網址: Burger Lab Facebook