澳門文創村．水坑尾百老匯中心美食

MrMrsFoodHK今次就試左文創村中兩間食店，分別是Royal-Place尚堂及脆卜卜雞蛋仔：

當日我地比較早到達澳門文創村，部分店鋪都未有營業，甚至見到部分鋪位尚未租出，可以逛的不算多。文創村一樓、二樓中有商品零售、手作小店、藝術品展示、漫畫作品展。



文創村週末定期會舉辦工作坊，週末人流會較旺。不過相對其他地方嘅文創村，澳門呢個仍然發展中，希望之後會有多啲創作人加入，加強該處吸引力。


至於文創村三樓主要提供餐飲，以小食、咖啡為主，而且有唔少位置，文青大可參觀完喺度稍作休息，醫肚。由於時間、肚皮所限，未能一一試哂，但都有兩間小店可以推介俾大家。

Royal-Place尚堂．手感の創作屋

Royal-Place主打用各種日本原材料製成甜品、食物、飲品，特別強調使用日本宇治市最有名嘅茶園之一 - 丸久小山園嘅抹茶粉，用上屬於上級水平嘅若竹抹茶粉。


尚堂除手作抹茶雪糕外，仲提供一系列抹茶/焙茶手沖茶。

宇治抹茶拿鐵 $33

呢個自稱係全澳首創嘅漸層宇治抹茶latte，以標榜使用日本抹茶粉沖嘅飲品以言，定價合理。宇治抹茶拿鐵用上丸久小山園抹茶粉，加上明治4.3牛乳，抹茶、牛奶漸層明顯，賣相討好，飲用前需搖勻。
老闆娘介紹時話佢地嘅抹茶飲品甜度較低，著重回甘，希望參照日本正宗手法。抹茶味突出，質地厚滑，有回甘效果，飲到尾會有少許苦澀。呢杯拿鐵甜度可以話係零，唔知係咪因為使用明治牛乳，奶味相對薄弱，所以亦都能夠解釋何以完全唔甜。

宇治焙茶沙冰 $33

天氣開始悶熱，覺得拿鐵唔夠涼爽，可以選擇尚堂宇治焙茶沙冰。 比起抹茶，焙茶少了一份苦澀，但茶香濃厚，完全唔甜膩，更推薦焙茶飲品！沙冰打得夠碎，入口即溶。


除左提供抹茶/焙茶飲品、手作雪糕，呢度仲有幾款大熱口味嘅芝士撻，分別有芝士、宇治抹茶、宇治焙茶、限定嘅紫薯，四種口味。

宇治焙茶芝士撻 $18

呢個尚堂焙茶撻一試愛上，推介呢款啊！選用上等宇治焙茶再人手製成撻皮，令我最近沉迷焙茶嘅源頭。識食真係要食焙茶！焙茶芝士撻外形精緻，微溫。

紫薯芝士撻 $18

個人對紫薯食品唔係好沉迷，但亦都唔抗拒，所以都試埋呢件期限定嘅紫薯撻。小店用嘅係純天然紫薯，每日新鮮製作，冇添加人造色素，可以放心食。紫薯味道唔算好強烈，味道帶甜，天然唔假，配合芝士撻都唔會好膩。同焙茶撻一樣，紫薯撻嘅流心效果都澎湃！

價錢唔貴，唯獨size偏小，感覺比香港食開嘅芝士撻再細啲。認真講，我兩啖可以食完啊，勁回味，成為每次黎澳門去文創村嘅動力！

脆卜卜雞蛋仔

第二間小店係脆卜卜雞蛋仔，位置就喺尚堂．手感の創作屋附近，賣嘅係雞蛋仔、窩夫、夾餅、小食。雞蛋仔口味陳出不窮，款式愈見花巧，加左雪糕嘅雞蛋仔喺香港亦都曾經流行，但喺澳門並唔常見。

聖誕繽紛杯 $40

脆卜卜雞蛋仔的雞蛋仔即叫即做，需時等候。聖誕繽紛杯其實就係草莓口味，材料有新鮮草莓、香蕉、草莓醬、雪糕、忌廉、脆米、手指餅。一拎上手，非常有份量，唔能夠垂直放置，所以食嘅時候難免狼狽。


草莓係新鮮切，酸酸甜甜，份量唔少。脆米有助增添口感，雪糕係普通貨色，幸好溶嘅速度唔會太快。主角雞蛋仔微脆，唔係空心，當然比起香港嘅雞蛋仔，蛋味唔夠香濃，稍為遜色。整體味道不俗，價錢合理，不妨支持下小店。


總括而言，澳門文創村仍然發展中，未見好多特色小店，但三樓飲食區有唔少小食，去到澳門有時間不妨去水坑尾行個圈！

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com