柏林頓班戟屋（柏林頓窩夫）．澳門遊

上次我地去嘅係東方斜巷店，鬆餅相當出色，而且份量唔少，MrMrsFoodHK今次就去左近白馬行分店，試埋小店嘅鹹食班戟。
喺香港食crêpes冇8、90蚊都走唔甩，成日覺得澳門物價接近香港，但相對上柏林頓班戟屋定價都合理，幾個朋友share食相當划算。柏林頓窩夫位於小巷中，位置較癮蔽，但門面就幾亮眼。柏林頓班戟屋餐廳裝潢花過心思，靠近門口係比較悠閒嘅梳化位置。


人多都唔怕坐得唔舒服。呢間分店明顯比東方斜巷嘅闊落、空間感足，而且人流冇嗰邊咁旺，所以我地都慢慢食，hea一陣。

韓式芝士粟米辣雞荷蘭餅 $75

我地非常推薦柏林頓班戟屋呢款味道嘅荷蘭餅，賣相已經好吸引，睇落似薄餅，其實係班戟底，周邊做到又薄又脆口！荷蘭餅配料豐富，有雞肉、粟米粒、生菜絲，芝士，以韓式辣醬調味，份量頗多。
食嘅時候先切開一件件，由中間向外卷，直接揸住食更爽，口感有pancake嘅元素，邊位脆口，加上辣雞味道突出，惹味非常！配合生菜絲、粟米粒，除左可以增添口感，同時減輕肥膩感，兩個人食清光覺得飽，但完全唔會滯，計番價錢仲覺得好抵食。唔鐘意食辣嘅尚有其他款式，例如煙三文魚、牛油果卷餅，仲有黑松露雜菌荷蘭餅等。

芝士軟殼蟹格仔餅(窩夫)　配　現炸薯角及芝士醬 $79

賣相相當吸引，以軟殼蟹為主角，用兩件格仔餅夾住，類似漢堡造型；加上薯角、沙律，同樣都係抵食之選！
格仔餅實心有份量，軟硬適中，唯獨爭少少蛋香。軟殼蟹size一啲都唔細，有霸氣，食落脆口，值回票價。芝士汁由於採用水牛芝士，較為軟身，容易做成拉絲效果，不過味道相對唔會太濃烈，可以考慮加少少海鹽調味。


而薯角有驚喜，熱辣辣即時炸起，非常香脆，就算唔係即時食都依然保持。旁邊嘅沙律菜既作為點綴，亦同時減輕成份格仔餅嘅油膩感。


鹹嘅班戟好啱我地口味，推薦大家去白馬行分店一試。至於甜食，我地揀左兩款，包括招牌朱古力卷、窩夫。

雜果黑糖麻糬窩夫　配　香草雪糕 $68

窩夫質地、口感基本上差唔多，裡面夠軟熟，如果加少少焦糖喺面頭，做到外脆內軟更好。


特別之處係窩夫中間係麻糬夾心，少少甜，食落煙韌，就算唔加糖漿都好夠味。雲呢拿雪糕冇乜特別，反而伴碟嘅雜果夠多，有香蕉片、士多啤梨、奇異果、菠蘿、藍莓，幾大方！

招牌朱古力卷 $62

招牌朱古力卷以班戟配上花生醬、oero、花生、朱古力醬、淡忌廉，再加一球雪糕，份量非常大，如果好似我地咁之前已經食左幾樣野，隨時食唔哂。12吋嘅荷蘭甜薄餅卷左兩層，口感軟熟，一層一層朱古力醬、花生醬相隔，甜度適中。


雖然有oreo碎餅、花生粒，但可能比較碎，口感唔係太明顯，食落會較單一。


柏林頓班戟屋飲品方面都有唔少選擇，有咖啡、朱古力飲品、果汁、沙冰、奶昔等，定價三十幾蚊左右。

薄荷青汁 (青瓜、雪碧、薄荷葉) $34

青汁比較解膩，所以揀左呢杯，飲落清新，不過薄荷味唔夠強烈。

雜錦樂園 (香蕉、小蜜桃、芒果、雜莓) $34

鮮榨果汁比較健康，水果混合味道酸酸甜甜。


總括黎講，我比較喜歡柏林頓班戟屋嘅鹹食，價錢唔貴之餘頗有水準。去到澳門唔想淨係食葡撻、豬扒包可以試下班戟。當然啦，話就話係班戟主題店，其實佢地仲有沙律、意粉、意大利飯等主食，並非班戟愛好者先可以黎。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com