鮨豊．天后小店廚師發板（已結業）

6月18日,2018
作者 MrMrsFoodHK
發佈於人氣食店

(2 票)

【特色餐廳】【天后美食】潮流與即興，連帶近年飲食文化都興起Omakase，意思是廚師發辦，最適合有選擇困難症的朋友。據說Omakase也是日本料理的最高境界，食客食的是掌廚的經驗及對食物配搭的品味與要求。雖然不問菜單，不問做法，但隨時能食出驚喜。鮨豊這間天后隱蔽小店，據介紹餐廳老闆自營日本海產分銷生意，鮨豊的食材近乎每日由日本築地空運來港，故此食材能保證高質新鮮。

更多最新「人氣食店」文章： » Tartes & Pop．精緻法式撻｜上環美食 » 2024深水埗必食．吃得精才是王道｜5大深水埗必吃美食！ » 鮨燐．傳統關東江戶前Omakase｜上環Omakase » Samsen 泰館．上環人氣米芝蓮泰國菜｜上環美食 » Sick Burger．銅鑼灣漢堡新勢力

鮨豊面積唔大，全店二十多個位置，裝潢富日本風格，以木枱為主。鮨豊有幾個吧枱，亦有卡座，如果想直接同師傅有交流，當然係選擇坐吧枱。卡座之間用竹簾隔開，枱與枱間空間感足，唔會話你眼望我眼。

鮨豊餐牌供應一款套餐，包括前菜、壽司、小食、海鮮丼、湯、甜品，定價$800/位；另外當然可以選擇廚師發板，定價$880/位，包括冷砵、前菜、壽司10件、手卷、湯及甜品。
星期五晚上黎到，吧枱位置已經全被預約，對於位置我地要求不大，坐卡位亦都冇問題。如果鐘意坐吧枱，睇住師傅製作過程，或者喜歡同師傅交流下嘅客人，建議盡早預約位置。當晚應該係幾個熟客，似乎都經常光顧，同師傅傾得不亦樂乎。睇過餐牌後，決定點兩份「廚師發板」就好了，不傷腦筋之餘，又充滿期待感。

前菜

松葉蟹起肉，份量不少，入口啖啖蟹鮮；鮟鱇魚肝口感有少少似鵝肝，味道香濃，加醋調味唔會好膩。

壽司10貫

白松露車海老

造型好有霸氣，車海老食落爽口，有少少白松露喺面頭，配搭新鮮。

秋刀魚

本來都擔心秋刀魚會有腥味，點知味道濃郁冇腥，搭配少量薑蓉，肉質富彈性，魚肉鮮嫩。

鯛魚

肉質薄身較黏，魚肉透明，味道清雅，魚味唔會太濃。

赤貝

新鮮大塊，外面爽脆，貝肉軟腍。

鰤魚

第一次食呢種魚，帶微紅斑紋，口感柔軟，油脂豐富。

拖羅

我地第一件食呢件，極具驚喜，油脂豐富，咬落口兩邊油脂溢出，入口即溶，令我地好回味。

吞拿魚蓉手卷

卷成長形，吞拿魚蓉突出，同飯量平衡，包到最尾，唔係白飯手卷，面頭加有少量芝麻。吞拿魚蓉軟綿而滑，芝麻好香，為魚蓉提鮮，一路食一路有魚蓉喺手卷尾部爆出，可見份量大方。為免紫菜變腍，上枱就盡快食，非常滿足，食完一件好想再食第二件。

喜知次

生長於深海，產量唔多，屬頂級魚獲，任何做法都好食。肉質軟綿細嫩，魚味濃郁，果然係魚王。

貝

入口爽脆鮮甜，不過係眾多壽司之中難免顯得冇咁亮眼。

金目鯛

屬於矜貴魚種，新鮮肥美，魚味愈嚼愈突出。

蛋

以蛋漿、魚肉、蝦肉焗製而成，驟眼睇落好似蛋糕，兩邊金黃色，口感綿密，而且味道鮮甜，非常美味。

立魚湯

魚湯鮮味十足，濃郁唔腥，肉質嫩滑，裡面料多，日本豆腐唔洗講實滑溜。店員仲同我地講，湯碗裡面嘅畫花係人手繪製，價值不菲，我一路食都驚啊(笑)。

紅豆抹茶奶凍、蜜瓜

最後修改於 10月13日,2020

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com

鮨豊．天后小店廚師發板（已結業）

查看地圖

地址: 天后琉璃街4號地下
開放時間: 星期一至六12:00 - 15:00 18:00 - 23:00

星期日及公眾假期 12:00 - 15:30　18:00 - 23:00