泰越概念 V.Thai．新派泰越菜（已結業）

10月11日,2017
作者 MrMrsFoodHK
發佈於人氣食店

(2 票)

【特色餐廳】【銅鑼灣美食】香港有不少主打東南亞菜的餐廳，其中以泰、越美食最受歡迎。講到泰國菜，好多時都會提到九龍城，畢竟好多九龍城泰菜仍是由泰國人主理，由裝潢到店員都好冇地道風味。不過亦有不少人鐘情新派泰、越菜，環境較企理較，服務講究，食物亦同樣有水準！這間名位「泰越概念 V.Thai」的餐廳，位於銅鑼灣商廈Aura on Pennington，主打泰越菜式，加入fusion元素、概念，創作出不少全新泰越風味，水準不俗。

更多最新「人氣食店」文章： » 玩具屋．猶如置身日本的居酒屋｜天后日本餐廳 » Sick Burger．銅鑼灣漢堡新勢力 » BE LEAF．觀塘人氣峇里度假風餐廳 » 2024深水埗必食．吃得精才是王道｜5大深水埗必吃美食！ » 夏銘記．老字號世一手打魚蛋｜佐敦美食

泰越概念裝潢簡潔，以梳化位、卡座為主，光線充足，驟眼睇就唔算話好有泰菜特色嘅裝修，但間中都見到有啲大象擺設。環境方面唔錯，坐得舒舒服服。雖然係週日晚上，但泰越概念客人唔多，可能餐廳尚新，因此店員招待都細心有禮，不時換上乾淨嘅碗碟，食物方面都頗有水準，而且價錢合理，可以一試呢，新張期間仲有啲款式有優惠價。

泰越概念 V.Thai的餐牌供應泰越菜式，選擇豐富，有小食、串燒、沙律、湯品、海鮮、咖喱、主食、蔬菜、粉麵飯、甜品，亦都有較特別嘅「融合」fusion菜式，例如蝦球伴鵝肝、慢火灼魷魚等。

泰越拼盤 $128

一行四人決定點個拼盤，唔洗煩，試到多啲款式。拼盤有一口春卷、扎肉炸蝦片、香茅單骨雞翼、手打蝦餅四款，即時製作，新鮮熱辣。蝦餅表面炸至香脆，肉質彈牙；一口春卷酥脆唔油膩；單骨雞翼入味肉嫩；扎肉炸蝦片都係常見菜式，唯一挑剔係醬料盤太窄，唔能夠成塊蝦片浸到酸辣汁。

慢火灼原隻魷魚 $88（原價$128）

泰越概念的原隻魷魚有兩款煮法，可炭火燒或慢火灼，因為後者有新張優惠價，一於試下。魷魚原隻上，簡單加有青紅辣椒、蔥花調味，配上芥茉豉油。魷魚十分嫩滑，而且爽口，烹煮時間剛好，冇加入繁複嘅調味令魷魚嘅鮮味更為突出，沾少少芥茉食已經簡單美味，但如果可以配個泰式生蝦汁俾我就更加正，更為惹味。
泰越概念

咖喱皇金瓜海蝦 $188

實物比圖片更多咖喱汁，我地幾個唔太肚餓，否則應該點個飯撈汁，咖喱調整至適合香港人口味，濃淡得宜，而且唔辣，容易入口。海蝦一共六大隻，非常新鮮，肉質爽口，裡面仲有唔少入味嘅金瓜。
泰越概念

西貢路邊燒春雞 $108/隻

即時製作，所以燒春雞接近最後先上枱，但一行四人都覺得春雞值得一試。上碟前已經分好四份，方便食用。燒雞皮香脆唔油膩，雞肉十分嫩滑，加入香料燒過，味道獨特，唧少少青檸汁，味道更加突出。
泰越概念

馬拉盞炒椰菜苗 $88

每次食泰國菜幾乎必點椰菜苗，輕輕加少少辣椒、蒜蓉去炒已經好入味。椰菜苗鮮嫩，完全唔會有苦澀味，食落爽脆，而且有豐富鉀質，仲有助消化。
泰越概念

飲品方面選擇多元，有鮮果汁、沙冰、朱古力、咖啡。追求健康嘅朋友可點鮮榨果汁，提供多款配搭，例如牛油果乳酪、西柚、青瓜、水蜜桃、奇異果等。至於我就推薦原個菠蘿沙冰，夠哂清甜。

泰越概念

最後修改於 10月9日,2020

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com

泰越概念 V.Thai．新派泰越菜（已結業）

查看地圖

地址: 銅鑼灣渣甸街66號Aura on Pennington 3樓
開放時間: 星期一至日11:30 - 22:30
交通資訊: 港鐵銅鑼灣站 F1 出口, 步行約3分鐘
電話號碼: 21533933
網址: 泰越概念 Facebook