葡匯咪走雞葡國餐廳．葡裔大廚主理（已搬遷）

今次就試左兩款招牌。葡匯咪走雞葡國餐廳佔地頗廣，裡面有長枱、圓枱、卡座、梳化位等，應付不同需要。門外亦放有餐桌，提升餐廳嘅空間感。我地被安排坐喺梳化位，十分舒適。周圍都有唔少葡式擺設，旗子、葡語系國家嘅地圖特別亮眼，更加成為我地兩個嘅話題 (笑)。

葡匯咪走雞葡國餐廳的餐牌供應小食、湯、沙律、意粉、乳豬（要預訂）、黑毛豬、海鮮、飯、扒類、炒菜、甜品等，定價中上。食葡國菜經常遇到嘅問題係菜式份量頗多，人少嘅話未必點到好多野，而且消費唔平。我地兩個人試到嘅野唔多，食完主菜，本來見甜品好吸引都已經食唔落...

麵包

點餐後，店員都好快送上麵包，配以牛油、橄欖。麵包暖暖地，搽上牛油之後好快溶化，入口香脆鬆軟。

傳統葡式拼盤 $95

小食方面，葡匯咪走雞葡國餐廳 有烤沙甸魚、臘腸、馬介休球、多士、薯條等，定價$40/55。但今次只有兩口子，所以瞄準拼盤，希望試多幾款，唔會太飽。拼盤有三款，揀左最平嘅葡式拼盤，有葡國香腸、傳統馬介休球、酥炸魷魚件、香脆炸雞粒，二人份量。拼盤喺麵包上枱後不久就到了，新鮮熱辣，基本上都好對味，葡國香腸鹹香、馬介休球外脆內軟，酥炸魷魚炸漿唔厚，魷魚頗有份量，而且食落爽脆、炸雞粒都幾出色，外皮脆口，雞肉嫩滑。

霹靂非洲燒雞（全隻）$195

相對店家嘅招牌乳豬，我覺得燒雞嘅水準更高，曾經喺灣仔一間餐廳食過類似菜式，只可惜當時燒雞過左火，雞同比較鞋同老。
葡匯嘅燒雞令我幾滿意，單單係辣椒做成嘅醬汁已經不可看輕，辣度不一般，容易入口，卻喺口腔久久不散，幾惹味。
燒雞份量適中，唔止雞脾肉係嫩，其他部分都一樣滑溜，厚身但保留肉汁，唔會乾鞋。配上嘅薯條比較一般，有啲脆有啲已經變腍。

葡式烤乳豬 $280（1/4隻）需要預訂

想食乳豬嘅話記得訂枱時留豬喔，分為1/4、半隻、全隻，呢個比例頗貼心，起碼兩丁友黎，想食隻豬都有得諗下。距離麵包前後等左一小時先上枱嘅豬，雖然係即燒，都體諒，但如果唔需要等咁耐印象會更加好，需知道食完隻雞都已經飽飽地，等下又飽啲，等到豬黎我都唔係好食得落了，儘管隻豬其實質素都唔錯。乳豬切成四大件，外皮薄身香脆，豬肉肥厚，油香充足。配上葡式炒飯，兩個人食相當足夠。炒飯加有茄醬、葡萄乾、橄欖等材料，食落酸酸眯眯，冇咁容易飽膩。

奶昔雜莓 $50

飲品方面有咖啡、茶、果汁、汽水、奶昔等，定價$35-55。奶昔可選咖啡/鮮雜果/薑/雜莓呢幾款味道，揀嘅雜莓味道一般，莓味唔夠突出，甜又唔係酸又唔係。

餐廳環境不錯，店員服務都幾好，繁忙得黎態度有禮，主動加水，食物方面都如他人所言，頗有水準。
大廚本身係葡裔，點都有多少保證，以後想起葡菜，又過唔到大海的話，葡匯或者係其中之選。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com