Springfields．中環法式小店（已結業）

Springfields餐廳位於中環擺花街，唔知係咪位置唔太起眼，需要落地庫，下午茶時間客人唔多，只係間中都見到客人買杯子蛋糕，我地就特別享受冇人打擾，靜靜地食個下午茶嘅時間。


沿住樓梯落去，會見到一個小凍櫃及一個開放式廚房，Springfields座位唔多，但空間感足，光線充足，一邊係梳化位置，以雲石紋枱面襯托；一邊係面壁位，用上白色磚牆及木枱，食物點影都靚啊。




Springfields餐牌供應沙律、湯、意粉、鹹甜可麗餅，另有幾款杯子蛋糕，平日有午市套餐定價$68-86，可以加錢配甜可麗餅 /小食 / 飲品。3pm後亦有下午茶供應，定價$58-88，價錢公道。

Chips $45

薯條即時炸起，配上自家製嘅蕃茄醬、沙律醬，用上粗薯，加有少量黑椒，食落唔會太鹹，十分香脆。 配合醬料，好好味呢，特別係沙律醬，令人食唔停口。

Chicken Wings $70

Springfields的雞翼一份五隻，同樣地係即時炸起，炸漿唔厚，入口香脆，但雞翼保持嫩滑，值得一讚。配上醬油味道嘅醬汁，都幾特別，但略嫌本身雞翼醃得唔夠味，單靠醬汁或多或少有點單調，如果雞肉本身稍醃會更好。

Creamy Carbonara $86

卡邦尼賣相好吸引，即時煮起，配料份量都多，有煙肉、蘑菇，簡單炒過，有獨特嘅香料味，味道都唔錯 意粉粗身，軟硬適中，份量很足。
而我地最喜歡係creamy得黎唔會太多汁，剛剛好足夠掛於意粉上，入口不會過份濃稠，亦都冇過份加入芝士等配料，令成件事唔會好飽滯，輕易就食得哂。

Sassy Salmon $106

本來實左已經夠飽肚，但想著一場黎到，冇理由唔試試Springfields主打嘅可麗餅，一於喺當中挑選一款。鹹嘅可麗餅有超過十款，定價$70-110，有芝士、雞蛋、海鮮、煙三文魚、薯仔、蘑菇等不同配搭，亦可以$10-20自由加入配料。
花多眼亂之下揀左有人推薦嘅煙三文魚款式，味道果然不俗呢。可麗餅即時做起，一路整已經聞到好香。賣相都幾吸引啊而且可麗餅嘅份量都唔野少，自己一人難以KO。
除左煙三文魚，仲有紅蔥、雞蛋、沙律菜等材料，餅皮入口軟熟，帶微微焦香，煙三文魚同可麗餅配搭得宜，食落鹹鹹地，再配上煎蛋嘅少量蛋液，唔會太乾身。

Salted caramel pretzel、Strawberry shortcake $55/杯

飲品方面有熱茶、咖啡、果汁、奶昔、啤酒等，我地揀左兩杯奶昔，質素十分不錯，係少有飲過覺得回味嘅milkshake呢。
岩鹽焦糖嘅奶昔入口香甜，焦糖味相當突出，最重要係甜度不過份，面頭嘅忌廉幼滑不膩，而賣相又咁靚，不能錯過。
而我點嘅士多啤梨奶昔同樣十分出色，味道天然唔會好人工，清涼解渴啊。


我仲留意到佢地餐單列明，每惠顧一份午餐，佢地會捐出1蚊俾NGO-umbrella foundation，資助兒童，咁有心嘅機構好值得大家去認識同支持。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com