Cafe Siam．米芝蓮推介泰國菜

其實隨住港鐵線申延，西區近年都有不少新屋苑落成，亦有不少外藉人士居住，變相吸引唔少新食店進駐，食肆選擇更多元。聽到港島區，加上係打住米芝蓮推介嘅食府，會以為價位都堅離地嗎？又唔係喎，反而定價都接近一般嘅泰國菜館。今次MrMrsFoodHK就試左Cafe Siam幾款菜式：

Cafe Siam堅尼地城店裝潢帶少少懷舊味道，環境寬敞，坐得舒適。餐廳面積唔算十分之大，但用上木枱、木凳襯托灰色牆身、色調和營諧，營造空間感。


因為有唔少人都喜歡喺飯前飲杯酒，Cafe Siam餐廳亦設有吧枱，每逢假日特別多客人黎過一個悠閒下午。


Cafe Siam餐單選擇豐富，有泰式小食、沙律、湯、咖喱、海鮮、肉類、蔬菜、飯麵、甜品等。

青檸蝶豆花特調 $38 (原價$48/新張優惠)

賣相好靚嘅飲品，大玩漸層顏色，蝶豆花本身冇味道，所以呢杯其實就係青檸梳打，可按個人喜好添加糖水，中和酸味。

泰式奶茶 $48

茶味較淡，飲落有少少雲呢拿味，同港式奶茶好唔同。

冬蔭蝦湯 $80

睇個賣相以為一般？但好好飲啊，份量大概有兩碗半，真材實料！裡面有兩隻新鮮大蝦，蝦肉爽口彈牙，加上磨菇，值回票價；香茅味唔會過重，飲落唔會太鹹，適合港人口味。

泰式單骨雞翼 (冬蔭) $68

Cafe Siam這款單骨雞翼係西環店限定，雞翼切開一半，方便食用，冬蔭味道唔算好強烈。單骨雞翼一般比較乾身，所以配合泰式醬會更好食。

燒豬頸肉伴酸子醬 $92

豬頸肉燒得剛好，外皮微脆，肉質保持腍嫩，而且份量頗多。附上酸子醬中和，食落完全唔會油膩，反而更惹味，推薦！

香芒牛柳粒 $158

賣相非常吸引，牛柳粒煎得腍身，完全唔韌，而且冇筋；芒果肉香甜，加上炒過嘅洋蔥，配合得宜。比想像中味道好，唯份量唔算好多，性價比唔高。

椰汁焗飯$108 (雞肉/豬肉/牛肉/蔬菜/蝦+$20)

Cafe Siam這款椰汁焗飯好有驚喜！店員表示，椰青係泰國直送，印上店家名字，增添獨有特色。以新鮮開嘅椰青，椰青水，再加上椰漿焗製而成。一上枱已經聞到清香椰子味，有別於一般泰國菜館食到嘅椰青飯，唔會有過多椰油，食落清新不膩。

我地選擇雞肉，雞肉份量唔多，稱唔上嫩滑；面頭有少量肉鬆、腰果，加上飯中椰子肉，增添口感，但唔蓋過椰香；米飯加入適量椰漿，食落唔會過黏。整體黎講係水準之作！相信如果點蝦肉，會更鮮味。

蒜香椒絲炒椰苗 $76

椰菜苗纖維高，有助消化，而且一般要喺泰國餐廳先食到，所以我地必點椰菜苗。椰菜苗新鮮葉嫩，食落唔苦，以蒜蓉椒絲輕炒，並冇過多油份，屬健康之選。


甜品方面有布甸、黑白糯米、雪芭、果盤、泰式糕點等，我地試左兩款。

香芒黑白糯米 $68

推介之選！糯米、紫糯米都非常軟熟，微暖，芒果肉熟透，甜而不膩，加上適量椰奶，果然係店家招牌！而且份量頗多，兩至三人分享剛好，特別食完幾款鹹食，以甜品作結，非常滿足！

菠蘿雪芭 $68

以迷你菠蘿造型呈上，令平凡嘅雪芭帶點不平凡。菠蘿味道天然唔假，食落清涼解膩，帶少少甜味。另一款椰子雪芭相信都唔錯呢！


整體黎講，Cafe Siam環境舒適，食物有水準，用料新鮮，特別推薦冬蔭公湯、椰汁焗飯及香芒黑白糯米。西環分店喺週末下午更加推出"all-you-can-eat brunch"，價錢都幾吸引架。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com