奈雪の茶．深圳遊

MrMrsFoodhk今次就去左深圳海岸城分店試咗奈雪の茶的茶飲、軟歐包：

奈雪の茶海岸城店很有規模，近門口位置係收銀處，任何時間都有長長人龍，右邊有麵包櫃，裡面有餅房，定時新鮮出爐麵包。雖然店內位置非常多，但由於採取自助形式，唔會有店員催趕，好多客人都會坐一段時間，情況就類似星巴克，加上人氣高企，要搵位都有難度。我地黎過兩次，一次平日下午茶時間，人頭湧湧；另一次係週六，早上人流較少。



雖然人多，但唔會感覺逼狹，聞說裝潢出自國際設計師手筆，個人認為垂下嘅吊燈做成蒲公英狀，別具一格。



先排隊點單，店員會叫號，雖然人多，但等候時間唔會太長，約十多分鐘。供應冷泡茶、現萃茶、鮮果茶、可配芝士奶蓋 / 牛奶，另有奶茶、沙冰等超過30款茶飲，定價RMB¥12-28。 茶葉大部分來自台灣地區，例如阿里山區嘅青心烏龍、蜜香烏龍，來自鹿谷嘅凍頂烏龍等，強調茶好，簡單泡就好飲。

芝士奶蓋阿里山初露 (少糖)  RMB¥25

茶飲有固定份量，熱飲杯為500ml，冷飲杯為700ml，其中最大杯嘅一款水果茶有1000ml，很有份量，至於冰量及糖份一律可以自選。芝士奶蓋味道較鹹，入口細滑，但個人認為喜茶嘅奶蓋做得厚身，香而不鹹，確係更出色。阿里山初露指清晨採集嘅高山茶葉，以超過40小時低溫焙火，味道清新，茶香甘甜，但唔會太濃。

霸氣牛奶草莓 RMB¥28

配牛奶嘅鮮果茶供應草莓及芒果兩款，因為用上鮮果，屬於季節限定款式。其他唔加入牛奶嘅果茶有7款，例如橙、百香果、檸檬等。茶飲強調用上鮮果，並冇加入太多冰沙，所以飲品唔會好挺身。牛奶份量多，放置一段短時間，已經開始滲入果茶中，形成唔太清晰嘅漸層。草莓可能唔係當造時節，甜度唔高，牛奶味反而更突出，個人唔識欣賞，交由伴侶飲哂。

軟歐包都係奈雪の茶嘅人氣產品，供應多款口味，而且每個月輪換。例如當月有抹茶芝士味、芝心三色薯、藍莓、Oero夾心、榴槤等口味，定價定價RMB¥12-28，款款都好吸引，「麵包控」不能錯過。軟歐包著重麵粉發酵嘅天然風味，強調低脂、低糖、低鹽，屬健康之選。喺香港嘅話，價錢相信係兩倍有多。







奈雪の茶麵包可以即場食用或外帶，有專人幫忙切割。

抹茶芝士圈 RMB¥12

本來係想試花花形狀嘅「抹茶朵朵」，但剛好賣哂，只好留待下次再試。奈雪の茶歐包非常軟熟，入口唔硬唔乾。麵包帶天然麥香，抹茶味道唔算太明顯，但加上淡淡芝士香及混有朱古力顆粒，增添口感。而且咁嘅價錢咁大個包，邊度搵。

紅曲蔓越莓 RMB¥14

第二次惠顧，我地選定呢款顏色好靚嘅蔓越莓歐包，依然軟熟，裡面加有軟芝士、莓乾，味道天然，喜歡食包嘅不妨一試。




深圳有好多食店不論規模、質素都不錯，奈雪の茶有相當高人氣，個人認為茶飲中規中矩，軟歐包反而更值得試下，價錢相宜，款式又多。奈雪の茶深圳分店位處各地，較為香港人熟識嘅除左有海岸城店，仲有KK mall、華強北九方購物中心等。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com