壹燕糖甜品．澳門遊

4月3日,2017
作者 MrMrsFoodHK
發佈於澳門好去處．澳門一日遊

(13 票)

【澳門好去處】【澳門美食】壹燕糖甜品位於澳門福隆新街，是早年到澳門幾乎必到的手信街，現而成為各式食店的集中地。壹燕糖甜品顧名思義以一系列燕窩甜品作主打，加上定價親民，實行將燕窩甜品平民化！不講不知，原來壹燕糖甜品老闆出生自海味世家，家族經營海味生意多年，當中為人熟悉的就是附近另一食店 - 添發碗仔翅美食。所以壹燕糖甜品取貨都是來自自家品牌，變相成本較低之餘，用料又有保證，難怪食落真材實料！當然除了比較傳統的燕窩甜品，小店尚有其他特式糖水、小食，值得一試。

MrMrsFoodHK今次試左壹燕糖其中幾款招牌甜品：壹燕糖甜品就位於福隆新街1號，門外保留街道嘅舊有風味。晚上黎到福隆新街更有味道，幾乎唔見遊客蹤影，我地都影左唔少相。

壹燕糖甜品店內相當闊落，而且乾淨企理。由於時間比較夜，我地都係當日最後嘅客人。

甜品款式唔少，分燕窩系列、芒果甜品、傳統石磨糖水、中式糖水。另外有不同款式嘅小食，例如撈麵、蛋撻、豬扒包等。

椰皇燉官燕 $98

話明壹燕糖甜品主打係燕窩，當然要試下佢地嘅招牌！燕窩款式都有幾款，有椰皇、燉奶、更滋補嘅花膠燉燕窩等，價錢唔貴。燕窩可以選擇燕盞或碎燕，當然價錢有別，相差幾十蚊，豐儉由人。

一場黎到，我又唔係成日有燕窩食，當然係點燕盞，呢款椰皇燉官燕有足足一両燕窩架，相當足料！如果選擇冰糖燉燕窩，相同價錢仲食到足二両燕窩。
壹燕糖甜品

椰皇裡面滿滿係燕窩，由於原隻椰皇燉，椰子味相當強烈，老闆話仲加左椰子水、奶等材料，難怪味道咁清新！燕窩足料唔洗講，睇番份量都真係相當抵食。喺香港食椰皇燉幾粒湯丸都六、七十蚊...
壹燕糖甜品

芒果腸粉 $32

芒果腸粉睇番評語都係必試系列，食過後都覺得不能錯過。腸粉睇落已經好滑溜，而且做得相當薄身，用上椰汁製作腸粉皮，所以都帶清甜椰子味。
壹燕糖甜品

芒果肉雖然唔算澎湃，但微微香甜，唔會有甜水感覺，食哂都唔覺得膩。
壹燕糖甜品

鮑魚撈麵 (鮑汁/XO) $120

賣相好吸引！兩隻大鮑魚、撈麵、生菜，好豐富。由於我地食過晚飯，所以二人分享，份量剛好。見我地大讚好味，老闆都解釋呢個鮑魚撈麵係佢地嘅招牌菜，由鮑魚、麵、調味等配料全部自己煮過，唔係現成貨，當中嘅誠意、功夫可想而知。
壹燕糖甜品

鮑魚大大隻，煮得腍身，食落爽口，鮑汁入味，唔係一般喺其他鋪頭食到嘅惹味！
壹燕糖甜品

麵嘅份量唔少，面頭有蝦米仔，食落唔腥。
壹燕糖甜品

燕窩薏米水 $25

食完鮑魚麵飲番杯薏米水，十分清涼。薏米水有利水祛水功效，啱哂女士。
壹燕糖甜品

總括黎講，壹燕糖嘅甜品都幾有水準，價錢合理，真材實料。如果有多幾個朋友一齊分享，可以試更多款式，特別推介椰皇燉官燕、鮑魚撈麵！

澳門福隆新街係昔日澳門最繁華嘅街道之一，至今仍然保留舊貌，除左黎食糖水，仲可以感受下街巷獨有嘅特色。

最後修改於 8月14日,2017

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com

壹燕糖甜品．澳門遊

查看地圖

地址: 澳門新馬路福隆新街1號地舖
開放時間: 星期一至日：12:30-23:30

MrMrsFoodHK

Life is short; Enjoy it !
唔是食家超唔專業只係鐘意食
Eat || Travel || Share

Instagram: https://www.instagram.com/mr_mrs.food
Facebook: https://www.facebook.com/pg/mrmrsfoodhk
Blog: https://www.pixnet.net/blog/profile/ywycarol