GetReady
列印此頁
柏林頓班戟屋.澳門白馬行店(柏林頓窩夫)

柏林頓班戟屋(柏林頓窩夫).澳門遊

(6 票)
澳門好去處】【澳門美食】 柏林頓班戟屋.澳門白馬行店(柏林頓窩夫):柏林頓班戟屋Paddington Pancakes來自馬來西亞,是一間以班戟為主題的餐廳,現時在澳門有兩間分店,最特別的是澳門的兩間分店分別提供不同形式的班戟。澳門柏林頓鬆餅(東方斜巷店)主要以美式班戟,即係鬆餅,或者香港人會叫作做熱香餅;而白馬行店,即柏林頓窩夫 Paddington Waffles,則供應歐式班戟,即係窩夫、可麗餅。除左有傳統窩夫外,柏林頓窩夫亦供應不少具創意性的鹹食班戟,有冇諗過班戟都可以當正餐食呢?





上次我地去嘅係東方斜巷店,鬆餅相當出色,而且份量唔少,MrMrsFoodHK今次就去左近白馬行分店,試埋小店嘅鹹食班戟。
喺香港食crêpes冇8、90蚊都走唔甩,成日覺得澳門物價接近香港,但相對上柏林頓班戟屋定價都合理,幾個朋友share食相當划算。柏林頓窩夫位於小巷中,位置較癮蔽,但門面就幾亮眼。柏林頓班戟屋餐廳裝潢花過心思,靠近門口係比較悠閒嘅梳化位置。
柏林頓班戟屋.澳門白馬行店(柏林頓窩夫) 柏林頓班戟屋.澳門白馬行店(柏林頓窩夫)

人多都唔怕坐得唔舒服。呢間分店明顯比東方斜巷嘅闊落、空間感足,而且人流冇嗰邊咁旺,所以我地都慢慢食,hea一陣。
柏林頓班戟屋.澳門白馬行店(柏林頓窩夫)

韓式芝士粟米辣雞荷蘭餅 $75

我地非常推薦柏林頓班戟屋呢款味道嘅荷蘭餅,賣相已經好吸引,睇落似薄餅,其實係班戟底,周邊做到又薄又脆口!荷蘭餅配料豐富,有雞肉、粟米粒、生菜絲,芝士,以韓式辣醬調味,份量頗多。
食嘅時候先切開一件件,由中間向外卷,直接揸住食更爽,口感有pancake嘅元素,邊位脆口,加上辣雞味道突出,惹味非常!配合生菜絲、粟米粒,除左可以增添口感,同時減輕肥膩感,兩個人食清光覺得飽,但完全唔會滯,計番價錢仲覺得好抵食。唔鐘意食辣嘅尚有其他款式,例如煙三文魚、牛油果卷餅,仲有黑松露雜菌荷蘭餅等。
柏林頓班戟屋.澳門白馬行店(柏林頓窩夫)

芝士軟殼蟹格仔餅(窩夫) 配 現炸薯角及芝士醬 $79

賣相相當吸引,以軟殼蟹為主角,用兩件格仔餅夾住,類似漢堡造型;加上薯角、沙律,同樣都係抵食之選!
格仔餅實心有份量,軟硬適中,唯獨爭少少蛋香。軟殼蟹size一啲都唔細,有霸氣,食落脆口,值回票價。芝士汁由於採用水牛芝士,較為軟身,容易做成拉絲效果,不過味道相對唔會太濃烈,可以考慮加少少海鹽調味。
柏林頓班戟屋.澳門白馬行店(柏林頓窩夫)

而薯角有驚喜,熱辣辣即時炸起,非常香脆,就算唔係即時食都依然保持。旁邊嘅沙律菜既作為點綴,亦同時減輕成份格仔餅嘅油膩感。
柏林頓班戟屋.澳門白馬行店(柏林頓窩夫)

鹹嘅班戟好啱我地口味,推薦大家去白馬行分店一試。至於甜食,我地揀左兩款,包括招牌朱古力卷、窩夫。

雜果黑糖麻糬窩夫 配 香草雪糕 $68

窩夫質地、口感基本上差唔多,裡面夠軟熟,如果加少少焦糖喺面頭,做到外脆內軟更好。
柏林頓班戟屋.澳門白馬行店(柏林頓窩夫)

特別之處係窩夫中間係麻糬夾心,少少甜,食落煙韌,就算唔加糖漿都好夠味。雲呢拿雪糕冇乜特別,反而伴碟嘅雜果夠多,有香蕉片、士多啤梨、奇異果、菠蘿、藍莓,幾大方!
柏林頓班戟屋.澳門白馬行店(柏林頓窩夫)

招牌朱古力卷 $62

招牌朱古力卷以班戟配上花生醬、oero、花生、朱古力醬、淡忌廉,再加一球雪糕,份量非常大,如果好似我地咁之前已經食左幾樣野,隨時食唔哂。12吋嘅荷蘭甜薄餅卷左兩層,口感軟熟,一層一層朱古力醬、花生醬相隔,甜度適中。
柏林頓班戟屋.澳門白馬行店(柏林頓窩夫)

雖然有oreo碎餅、花生粒,但可能比較碎,口感唔係太明顯,食落會較單一。
柏林頓班戟屋.澳門白馬行店(柏林頓窩夫)

柏林頓班戟屋飲品方面都有唔少選擇,有咖啡、朱古力飲品、果汁、沙冰、奶昔等,定價三十幾蚊左右。

薄荷青汁 (青瓜、雪碧、薄荷葉) $34

青汁比較解膩,所以揀左呢杯,飲落清新,不過薄荷味唔夠強烈。
柏林頓班戟屋.澳門白馬行店(柏林頓窩夫)

雜錦樂園 (香蕉、小蜜桃、芒果、雜莓) $34

鮮榨果汁比較健康,水果混合味道酸酸甜甜。
柏林頓班戟屋.澳門白馬行店(柏林頓窩夫)

總括黎講,我比較喜歡柏林頓班戟屋嘅鹹食,價錢唔貴之餘頗有水準。去到澳門唔想淨係食葡撻、豬扒包可以試下班戟。當然啦,話就話係班戟主題店,其實佢地仲有沙律、意粉、意大利飯等主食,並非班戟愛好者先可以黎。



最後修改於 8月14日,2017




立即 FOLLOW @GetReadyHongKong,緊貼全港郊遊玩樂、品味生活、人氣美食資訊!
Facebook @GetReadyHongKong
Instagram @GetReadyHongKong
廣告查詢:Advertising @ GetReadyHK.com
傳媒聯絡:Press @ GetReadyHK.com


柏林頓班戟屋(柏林頓窩夫).澳門遊
查看地圖

Life is short; Enjoy it !
唔是食家 超唔專業 只係鐘意食
Eat || Travel || Share

Instagram: https://www.instagram.com/mr_mrs.food
Facebook: https://www.facebook.com/pg/mrmrsfoodhk 
Blog: https://www.pixnet.net/blog/profile/ywycarol



柏林頓班戟屋(柏林頓窩夫).澳門遊
交通、位置、地圖及鄰近好去處

Copyright © 2013 - 2024 GetReadyHK.com. All Rights Reserved.